恒生梁太自爆曾冇職升憤怒 借機教青年冷靜處理方法

政府正推行嘅校園驗毒計劃，原意好簡單，就係拯救毒海嘅青少年，點知出現咗唔少爭拗，作為兩個女兒母親嘅恒生銀行（ 011）副董事長兼行政總裁梁高美懿噚日就公開表態，話絕對支持。
撐校園驗毒計劃

該行噚日舉行恒生獎學金得主分享會，梁太親自主持，喺會上被大學生問到對校園驗毒計劃嘅睇法，就舉咗個生動嘅例子。佢話佢兩個女仲係 BB嘅時候，即使跌損手腳，作為媽媽嘅佢，都會繼續畀 BB到處爬，但如果 BB伸手插入電掣窿，佢一定打 BB手仔，因為電親會死人 o架。
佢話對於大是大非嘅問題，認為係需要惡啲嘅。同樣青少年濫藥，對佢哋嘅一生影響好深遠，所以佢支持校園驗毒計劃，仲話要打擊毒品來源，兼且要加強對青少年宣傳濫藥並唔係潮流，而係害人。
其實國際學校一直有實施校園驗毒計劃；就算出嚟打工，佢話唔少公司都要求員工提交驗身報告，咁做亦冇壞。佢都搞唔清反對聲音係嚟自學生定係政客。
曾不忿建議未被採納

青少年入社會後必然面對唔少挫折，梁太後生時亦曾經因為自己嘅建議冇被上司採納而唔開心，有好表現又冇得升職而憤怒；佢教大學生解決嘅辦法，就係暫時離開崗位，例如游吓水、打吓波出一身汗，而佢自己甚至試過去教堂喊咗一場。
梁太仲話，千祈唔好將自己推入自己製造嘅圈套，正所謂退一步海闊天空，明天應該會更好嘅。